မဲခေါင်ငါးနိုင်ငံထဲမှ ကမ်ဘောဒီးယားအကြောင်း တစေ့တစောင်း

အပိုင်း(၁)

ထိုင်းနှင့် ကမ်ဘောဒီးယား နှစ်နိုင်ငံ နယ်စပ်ရှိ

ကမ်ဘောဒီးယားနိုင်ငံ၏ ဂိတ်ဝမုဉ်ဦး

ကမ်ဘောဒီးယားနိုင်ငံ၏ Siem Reap မြို့တွင် သစ်ပင်နွယ်ပင်များနှင့် ဖုံးအုပ်နေသော အလွန်ရှေးကျတဲ့ ကုန်းမြေဖွဲ့စည်းမှုများနှင့် ယဉ်ကျေးမှု အနှစ်သာရများ၊ ရှေးဟောင်းအနုပညာလက်ရာများသည် သဘာဝဘေးအန္တရာယ်များကြောင့်လည်းကောင်း၊ စစ်ဘေးဒဏ်များကြောင့်လည်းကောင်း တိမ်မြှုပ် ပျောက်ကွယ်နေခဲ့ပါသည်။ ယခုချိန်တွင် ကမ္ဘာလှည့်ခရီးသည် များစွာတို့သည် ရှေးအခါက Khmer-Mon လူမျိုးများ အခြေချနေထိုင်ခဲ့တဲ့ Siem Reap မြို့သည် အံ့သြဖွယ်ရာကောင်းလှသည့် ရှေးခေတ် ခမာ-မွန်လူမျိုးတို့၏ ယဉ်ကျေးမှု ရှေးဟောင်းအမွေအနှစ်များတည်ရှိရာ အာရှတွင် ထင်ရှားသော အန်ကောဝပ်ဘုရားကျောင်းအပါအဝင် ရှေးဟောင်းဘုရားကျောင်းများသို့ လာရောက်လေ့လာကြကာ ဗဟုသုတရှာမှီးကြပါသည်။

ဘုရားကျောင်းများသို့ လေ့လာရန်အတွက် အဝင်ဝနေရာတွင် ဤသို့ ဝင်ကြေးပေးဆောင်ရပါသည်။

ခမာအမျိုးသမီးငယ်လေးတွေက ဝန်ဆောင်မှုပေးနေပုံ။

နိုင်ငံခြားခရီးသွားတစ်ဦးလျှင် တစ်ရက် သို့မဟုတ် နှစ်ရက်လည်ပတ်မည်ဆိုပါက တစ်ရက်လျှင် ဒေါ်လာနှစ်ဆယ် ပေးဆောင်ရပါမည်၊ ထို့နောက်ဝင်ကြေးပေးဆောင်ပြီးလျှင် ခရီးသွားအား ဓာတ်ပုံရိုက်ပေးကာ မိမိရုပ်ပုံလွှာပါသော လက်မှတ်လေးကို ကွန်ပျူတာဖြင့် လျှင်မြန်စွာ ထုတ်ပေးပါလိမ့်မည်။

အဝင်နေရာတွင် အန်ကောဝပ်ဘုရားကျောင်းနှင့် အခြားသော ဘုရားကျောင်းများ၏

မြေပုံရှေ့တွင် ဧည့်သည်များကို ခရီးသွားလမ်းညွှန်များမှ ရှင်းပြစဉ်။

ဘုရားကျောင်းဝင်းတစ်နေရာတွင် ခရီးသွားလမ်းညွှန်များမှ ဧည့်သည်များကို

အခုလို သမိုင်းကြောင်းများကို ရှင်းပြနေပုံဖြစ်ပါတယ်။

ဧည့်သည်များသည် အဝင်နေရာတွင် ပေးလိုက်သော လက်မှတ်လေးကို သိမ်းထားရပါမည် အဘယ်ကြောင့်ဆိုသော် ဘုရားကျောင်းများသို့ ဝင်ရန် အဝင်ဝနေရာများတွင် အခုလိုတွေ့ရသော ဝတ်စုံများနှင့် တာဝန်ကျဝန်ထမ်းများက လက်မှတ်စစ်ဆေးကြမည်။ လက်မှတ်ပြနိုင်မှသာ ဘုရားကျောင်းများသို့ ဝင်ရောက်လေ့လာနိုင်မည်ဖြစ်ပါသည်။

ဆက်လက်ဖေါ်ပြပါမည်...

လေးစားစွာဖြင့်
bliss of us

တုံလီစပ်ရေကန် - ကမ်ဘောဒီးယား

ကမ်ဘောဒီးယားနိုင်ငံ၏ မိုးရာသီ ရေများချိန်၌ အာရှတွင် အကြီးဆုံးရေကန်ဟူ၍ ခမာလူမျိုးတို့ ဂုဏ်ယူကြသော ရေကန်မှာ (Tonle Sap Lake) တုံလီစပ်ရေကန်ဖြစ်ပါတယ်။

ရေကန်တွင်းနေ ဒေသခံကလေးငယ်လေးတွေ ကျောင်းဆင်းလာကြပုံ။

ရေထဲမှာ လူကြီးတွေ မပါပဲ ကိုယ်တိုင် လှော်တက်လေးနဲ့ မူလတန်းအရွယ်ကလေးငယ်လေးတွေ ကျောင်းဆင်းလာကြတာဖြစ်ပါတယ်။ ရေပေါ်မှာပဲ အိမ်ဆောက်၊ ရေထဲမှာပဲ အသက်မွေးဝမ်းကြောင်းကြ၊ ရေထဲမှာပဲ စာသင်ကြကာ ရေထဲမှာပဲ ဘဝတစ်ပါးကူးပြောင်းကြရတဲ့ ဒေသခံများ၏ ပုံရိပ်တွေကို လေ့လာနိုင်ပါတယ်။

အခုလို နိုင်ငံခြားသား ခရီးသွားက Siem Reap မြို့နဲ့ အနည်းငယ်လှမ်းသော တုံလီစပ်ရေကန်သို့ စက်ဘီးများ ငှားပြီး အလည်အပတ်ထွက်လို့ ဗဟုသုတရှာမှီးကြပါတယ်။

ရေကန်ထဲမှာတော့ အခုလို လောင်းလှေမျိုးနဲ့ ဧည့်သည်များ အဖွဲ့အလိုက် ရေကန်အတွင်း လှည့်လည် လေ့လာနိုင်ရန် စီစဉ်ပေးထားကြပါတယ်။ ထိုရေကန်သို့ လောင်းလှေနဲ့ လေ့လာလည်ပတ်ရန်အတွက် ဝင်ကြေးပေးဆောင်ရုံဖြင့် လည်ပတ်နိုင်ဖို့ ကမ်ဘောဒီးယားနိုင်ငံမှ စီစဉ်ပေးထားခြင်းဖြစ်ပါတယ်။ ခရီးသွားတစ်ဦးလျှင် ($15/-)နှုန်း ကျသင့်မှာဖြစ်ပါတယ်။

ရေကန်အတွင်းမှ အရပ်ဓလေ့နှင့် ကလေးငယ်များ

ဈေးရောင်းထွက်လာတဲ့ ရေကန်တွင်းနေထိုင်သော ဒေသခံတစ်ဦး

ထိုရေကန်တွင် နေထိုင်ကြသော လူမျိုးများမှာ ဗီယက်နမ်လူမျိုးများဖြစ်ကြပြီး၊ တံငါလုပ်ငန်းဖြင့် အဓိက အသက်မွေးကြပါတယ်။ ကမ်ဘောဒီးယားနိုင်ငံ၏ ငါး (၅၀%)ထွက်ရှိသောကြောင့် တုံလီစပ်ရေကန်သည် နိုင်ငံ၏ အဓိက အားထားရာတစ်ခုလည်းဖြစ်ပါသည်။

ဆက်လက်ဖေါ်ပြပါမည်...

လေးစားစွာဖြင့်
bliss of us

ရွှေနဲ့မြ

ရွှေဆင်းတုရုပ်ပွါးတော်၏ သမိုင်းရာဇဝင်များ ထားရှိရာ ပြခန်း

ရွှေဆင်းတုတော် ထားရှိရာ စံကျောင်းအောက်ထပ်တွင် ဘုရားသမိုင်းကို ကြည့်ရှုလေ့လာလိုသူများအတွက် ဝင်ကြေးမှာ တစ်ဦးလျှင် (100)ဘတ်ပေး၍ ဝင်ရောက်လေ့လာနိုင်ပါသည်။ ပြခန်းတွင် ဘုရားဆင်းတုတော် သွန်းလုပ်ပူဇော်ပုံ၊ ဘုရားပင့်ဆောင်စဉ် ထူးခြားသော အဖြစ်အပျက်များ၊ စသည့်သမိုင်းမှတ်တမ်းများကို လေ့လာနိုင်မှာဖြစ်ပါတယ်။

ဘုရားသမိုင်းကြောင်းကို အခုလို ရုပ်သံဇာတ်လမ်းဖြင့် ဖေါ်ကျူးပြသထားပြန်ပါတယ်။

ထို့အပြင် ပြခန်းတွင် ထိုင်းနိုင်ငံ၏ ခေတ်အဆက်ဆက်မှ ဘုရားပုထိုးစေတီများကိုလည်း အခုလိုမျိုး လေ့လာနိုင်ပါတယ်။ ခေတ်အဆက်ဆက်မှ သမိုင်းကြောင်းများ လက်ရာများကို အင်္ဂလိပ်ဘာသာ၊ ထိုင်းဘာသာများနှင့် ရှင်းပြထားတာ တွေ့ရမှာဖြစ်ပါတယ်။

ကြည်ညိုသပ္ပါယ်စွာ ဖူးတွေ့ရသော ရွှေဆင်းတုရုပ်ပွါးတော်

ဘယ်လိုရှုထောင့်ကပဲ ကြည့်ကြည့် အလွန်သပ္ပါယ်လှပါတယ်။

ရွှေအတိဖြင့် သွန်းလုပ်ပူဇော်ထားလို့ “ရွှေဘုရား” ဟူ၍ အလွယ်ခေါ်ကြပါတယ်...
ဝင်ကြေးငွေမှာ (40)ဘတ်ဖြစ်ပါတယ်။

ဒီပိုစ့်လေးမှာ ရေးထားတာလေးကိုလည်း ဖတ်ကြည့်ပေးပါနော်...

မြဘုရား
(အထဲက ရိုက်ခွင့်မပြုလို့ အပြင်က ကင်မရာဖြင့်လှမ်းဆွဲလိုက်ပါတယ်၊
သူများတွေလည်း အခုလိုပဲ လှမ်းရိုက်နေကြပါတယ်။)

မြဘုရားသို့ ဝင်ရောက်ဖူးမျှော်မယ်ဆိုလျှင် ဝင်ကြေးငွေ (350)ဘတ်ဖြင့် မြဘုရားအပြင် နန်းတော်ကိုပါ လေ့လာနိုင်ပါတယ်။ အချိန် သုံးနာရီလောက် ယူကာ လေ့လာသင့်ပါကြောင်း သတင်းစကား လက်ဆင့်ပါးလိုက်ပါရစေနော်။

Golden Mount မှ နွေ၊ မိုး၊ ဆောင်း မြဘုရားသုံးဆူ။

ထိုင်းနိုင်ငံကို ဗုဒ္ဓဘာသာဝင်များ လာရောက်လည်ပတ်ကြရာတွင် မြသားအစစ်ဖြင့် ထုလုပ်ပူဇော်ထားကာ ရွှေနှင့်ခတ်၍ပြုလုပ် ပူဇော်လှူဒါန်းထားသော သင်္ကန်းဖြင့် စံပယ်တော်မူသော မြဘုရားအားသွားရောက် ဖူးမျှော်ကန်တော့ကြလေသည်။ မြတ်စွာဘုရားဆင်းတုတော်ပေါ်တွင် လွှမ်းခြုံပူဇော်ထားသော သင်္ကန်းများသည် နွေတွင် (အလယ်ပုံ)မင်းမြောက်တန်ဆာငါးပါးဖြင့် တစ်မျိုး၊ မိုးတွင် (ဘယ်ပုံ)သင်္ကန်းရုံပုံစံနှင့် တစ်သွယ်၊ ဆောင်းတွင် အနွေးထည် ဝတ်ဆင်တော်မူသကဲ့သို့ တစ်နည်း သင်္ကန်းရုံသော ပုံစံကွဲပြားအောင် ရာသီသုံးမျိုးအတွက် လှူဒါန်းပူဇော်ထားပါသည်။ ထိုင်းလူမျိုးများနှင့် မြန်မာလူမျိုးအချို့တို့သည် နွေ၊မိုး၊ဆောင်းဘုရား ရုပ်ပွါးတော်များ ဝယ်ယူပူဇော်လိုကြပါသည်၊ အကြောင်းရင်းမှာ သုံးရာသီလုံး မြတ်စွာဘုရားကို ပူဇော်ကြည်ညိုရသော ကုသိုလ်ကြောင့် တစ်နှစ်တာပတ်လုံး အိမ်ထောင်ရေး၊ စီးပွါးရေး၊ လူမှုရေး အစစ အဆင်ပြေအောင်မြင်သည်ဟု ယုံကြည်မှုတစ်ခုကြောင့်ဖြစ်ပါသည်။

“ရွှေနဲ့မြ နေနဲ့လ” လို တင့်တယ်ခြင်းများနဲ့ ပြည့်စုံဖို့
တစ်နေ့တည်း ဘုရားနှစ်ဆူဖူးပြီး သံသရာအတွက် ကောင်းမှုကုသိုလ်တွေ စုကြပါစို့နော်။

လေးစားစွာဖြင့်
bliss of us

“အန်ကော်ဝပ်နံရံထက်မှ မြန်မာလက်ရေး စာ”

 အန်ကော်ဝပ်ရှိ အလယ်ဗဟိုတွင်မြင်ရသော မြင့်မိုရ်တောင်

အန်ကော်ဝပ်နံရံထက်မှ မြန်မာလက်ရေး စာ

အန်ကောဝပ်တွင်ရှိသော မြန်မာနိုင်ငံသားများ ရေးသားခဲ့သည့် နံရံထက်မှ လက်ရေးစာသည် အန်ကောဝပ်၏အဓိကနေရာရဲ့ ဒုတိယမုဉ်ဦး မြင့်မိုရ်တောင် မြတ်စွာဘုရားရုပ်ပွါးတော်ရှိရာ အဝင်ဝ ညာဘက်တိုင်နံရံမှာဖြစ်ပါတယ်။ အမြင့်ဆုံးလှေကားရှိရာ မြင့်မိုရ်တောင်သို့မတက်ခင် မုဉ်ဦးအဝင်ဝ ညာဘက် တိုင်တွင်ရှိပါကြောင်းကို ကမ်ဘောဒီးယားနိုင်ငံ အန်ကောဝပ်သို့ သွားရောက်လေ့လာမည့် မြန်မာခရီးသွားမိတ်ဆွေများအား အသိပေးလမ်းညွှန်လိုက်ပါတယ်နော်။

လေးစားစွာဖြင့်
bliss of us

လမ်းညွှန်မယ်နော် ဈေးဝယ်ဖို့...

ဂျပန်မအရုပ်လေးတွေ လိုချင်သူများအတွက်

ထိုင်းနိုင်ငံဆိုရင် ဈေးဝယ်ကောင်းတယ်လို့ မြန်မာအများသိပြီးဖြစ်ပါတယ်၊ ဘယ်နေရာတွေမှာ ဘယ်လိုပစ္စည်းတွေ ဈေးဝယ်လို့ကောင်းတယ်ဆိုတာကိုတော့ သေချာသိသူနည်းလှပါတယ်။ မြန်မာတို့ရဲ့ ထုံးစံအတိုင်း တဆင့်စကားဖြင့် စကား လက်ဆင့်ကမ်းကြသည်ဖြစ်လေရာ မိမိဝယ်ဖူးသော နေရာသည် အလွန် ဈေးသက်သာသည်ဟု ပြောဆိုကာ စေတနာဖြင့် လမ်းညွှန်ကြလေသည်။ ထို့ကြောင့် ဘန်ကောက်က “ပသူနမ်”တွင် ဈေးဝယ်လျှင် ဈေးသက်သာသည်ဟု ပြောစမှတ်တွင်ခဲ့တာ ယနေ့တိုင်ဖြစ်ပါတယ်။

ဈေးဝယ်မည့် နေရာရွေးချယ်ခြင်း
ပသူနမ်ဟု ခေါ်တွင်သော ထိုနေရာသည် နိုင်ငံခြားသားများအပြင် ထိုင်းနိုင်ငံသားများအတွက် ပါ ဈေးဝယ်ချင်စရာများသော နေရာတစ်ခုတွင် အပါအဝင်ဖြစ်ပါတယ်။ The Platinum Fashion Mall သည်လည်း ပသူနမ် ဧရိယာအတွင်းတွင်တည်ရှိသောကြောင့် ကျားမ လူငယ်များစိတ်ကြိုက်နိုင်သော ဖက်ရှင်ကုန်တိုက်တစ်ခုဖြစ်ပါတယ်။ ဒီဇိုင်းအသစ်များကိုသာ ဦးစားပေးရောင်းချသောကြောင့် ဖက်ရှင်ကုန်တိုက်ဟု ကြေညာထားဟန်တူပါရဲ့။ ထိုင်းကို လာလည်လို့ တခြားနေရာတွေလည်း လည်မယ်၊ အချိန်ကလည်း သိပ်မရဘူးဆိုရင်တော့ ဒီကုန်တိုက်မှာပဲ လူငယ်တွေအတွက် ဈေးဝယ်သင့်ပါကြောင်း လမ်းညွှန်လိုက်ပါတယ်။ ထိုဖက်ရှင်ကုန်တိုက်နှင့် အနီးဆုံးတွင် Pantip Plaza ရှိပါတယ်။ ထိုနေရာတွင် နည်းပညာပိုင်းဆိုင်ရာ ပစ္စည်းများ မျိုးစုံရရှိနိုင်လို့ နည်းပညာပိုင်းဆိုင်ရာဖြင့် အသက်မွေးဝမ်းကြောင်းကြသော ကိုကိုမမများ အကြိုက်တွေ့စေမှာဖြစ်ပါတယ်။

The Platinum Fashion Mall

နေရာသိပြီဆိုတော့ ဈေးဘယ်လိုဝယ်ကြမလဲ...

ဧည့်သည်အဖြစ်နဲ့ လာပြီး ထိုင်းဘာသာပြန်လည်း အတူမပါဘူးဆိုရင်တော့ ဈေးဆစ်ရတာခက်ပါလိမ့်မယ်။ ဖက်ရှင်ကုန်တိုက်မှာ သုံးထည်ဝယ်ရင် ဈေးလျော့ပေးတဲ့စနစ်(လက်လီမှ လက်ကားဈေးသို့)ကို စတင်ကျင့်သုံးပါတယ်၊ အချို့ဈေးသည်တွေက နိုင်ငံခြားသားမှန်းသိရင် How much? ပြောလိုက်တာနဲ့ ဈေးမလျော့ပေးတော့ပါဘူး။ စိတ်ကောင်းတဲ့ ဈေးသည်တွေကတော့ ပုံမှန်ပဲ လျော့ပေးတတ်တာလည်း ရှိပါတယ်။
အခြားကုန်တိုက်တွေကို သွားဖို့ အချိန်ကုန်မယ့်အစား ဒီဖက်ရှင်ကုန်တိုက်မှာပဲ အချိန်များများယူပြီး ဆံဖျားကနေ ခြေဖျားအထိ အလှအပများကို သေချာ ရွေးချယ်ဝယ်ယူသင့်ပါတယ်။ ထိုင်ဝမ်နဲ့ ထိုင်းထွက်ကုန်များကိုလည်း သေချာမေးပြီး ဝယ်ယူသင့်ပါတယ်။ ဈေးသည်တွေကလည်း ပွင့်လင်းစွာပြောပြကြပါတယ်။
ပသူနမ်ရှိ ကုန်တိုက်နှင့် လမ်းဘေးဈေးသည်များတွင်ရောင်းသော ကုန်ပစ္စည်းများ ဘာကွာခြားလဲဆိုလျှင်တော့ လမ်းဘေးဈေးဆိုင်လေးများသည် ထိုင်းနိုင်ငံရှိ စက်ချုပ်ရုံများမှ ချုပ်သော အင်္ကျီများ၊ ဖိနပ်များနှင့် လက်ကိုင်အိတ်များကို ဈေးနှုန်းသက်သာစွာဖြင့် ရောင်းကြတာဖြစ်ပါတယ်။ အရည်အသွေး အာမခံချက်နည်းပါးလွန်းတာမို့ နိုင်ငံရပ်ခြားမှာ တကူးတက လာရောက်ဈေးဝယ်ကြပြီး ဒီနေရာမှာ ဈေးတွေပေါလို့ များများဝယ်သွားမယ်ဆိုရင်တော့ မြန်မာနိုင်ငံရောက်ပြီး သိပ်မကြာခင်မှာ ပျက်စီးကြတာကို တွေ့ရမှာပါ။ အမျိုးအစားကောင်းတာလေးတွေလည်း လိုချင်တယ်၊ ဈေးလည်း သက်သာချင်တယ်ဆိုရင် ပစ္စည်းတစ်ခုတည်းကို မိသားစု၊ သူငယ်ချင်း စတဲ့ အကြိုက်တူသူများညှိနှိုင်းပြီး ဆယ်ထည် သို့မဟုတ် ဒါဇင်ဈေးဖြင့် ဝယ်ယူမည်ဆိုပါက အလွန်ဈေးသက်သာစေပြီး ပစ္စည်းကောင်းလေးကိုလည်း သုံးနိုင်မည်ဖြစ်ကြောင်း သတင်းစကားလက်ဆင့်ကမ်းလိုက်ပါတယ်။

အိမ်ခန်းတွင် အလှဆင် ပန်းအိုးလေးများ

မီးသီးလေးများနဲ့ ပန်းခက်ပုံအလှဆင်ကြမယ်...

MBK မှ အထပ်များစွာတွင် ဈေးဝယ်ကြမယ်...

ထိုင်း-မြန်မာစကားပြန်တော်တော်များများက MBKမှာ ဈေးဝယ်သင့်ကြောင်း ညွှန်းကြပြန်တယ်။ စကားပြန်ပါရင်တော့ ဈေးဆစ်တာ၊ ပစ္စည်းရွေးနိုင်တာ၊ ပစ္စည်း စစ်မစစ်က အစ ဂျီးများနိုင်ပါတယ်။ ရေမွှေးများ၊ အလှကုန်ပစ္စည်းများ၊ အထည်အလိပ်များ၊ ထိုင်းရိုးရာအမှတ်တယပစ္စည်းများ၊ လက်ကိုင်ဖုန်းများ၊ နာရီအမျိုးမျိုးအပြင် လူ့အသုံးအဆောင်ပစ္စည်းများစွာကို ဝယ်သူ စိတ်ကြိုက်စကားပြန်များက လိုက်လံဝယ်ယူပေးနိုင်တဲ့နေရာဖြစ်ပါတယ်။

The Mall, SiLom Central များကတော့ ထိုင်းနိုင်ငံအနေနဲ့ဆိုရင် သူဋ္ဌေး သူကြွယ်များနဲ့ ပညာရှင်များ ဈေးဝယ်သောနေရာများလို့ ဆိုကြတယ်။ ထိုနေရာများမှ ပစ္စည်းများနှင့် The Platinum Fashion Mall တွင် ရှိသော ပစ္စည်းများသည် အတူတူဖြစ်ကြသော်လည်း နေရာအနေအထား ထုပ်ပိုးမှုစနစ်များကြောင့် ဈေးကွာခြားနေတာဖြစ်ပါတယ်။ လက်ဆောင်ပေးရာတွင် The Mall, Central တို့မှ ဝယ်ပေးသော လက်ဆောင်ကို ပေးလျှင် ပေးသူလည်း မျက်နှာရ၊ အပေးခံရသူလည်း ဝမ်းသာဖြစ်တတ်ကြသေးတယ်။ ဒါကြောင့် မိမိနှစ်သက်သော နေရာများတွင် ပစ္စည်းများကို ရွေးချယ် ဝယ်ယူနိုင်ပါတယ်။

MBK မှ မြန်မာစကားဖြင့် ဈေးဝယ်နိုင်ပါတယ်လို့ ပြောတဲ့ မြန်မာဈေးဆိုင်ရှင်

ပုဝါနဲ့ ပိုးထည်များ

Big C တွင် တွေ့ရသော လက်ဆောင်ခြင်းများ အကြိုက်ရွေးလို့ လက်ဆောင်ပေးကြတယ်။

Tesco Lotus နှင့် Big C များတွင်တော့ အဝတ်အထည် လူသုံးကုန်မျိုးစုံတို့ကို ထိုင်းနိုင်ငံ၏ လခစား ဝန်ထမ်းများနှင့် အခြေခံလူတန်းစားများ ဈေးဝယ်အများဆုံးနေရာဖြစ်ပါတယ်။

ဒီလိုလေးလဲ ဈေးရောင်းထွက်ကြတယ်နော်

ဝန်ထမ်းအိမ်ယာများနှင့် ကျောင်းသားများ၏ အဆောင်များရှိရာ လမ်းများတွင် ယခုလို ကားဖြင့် မီးဖိုချောင်သုံး အသုံးအဆောင်ပစ္စည်းများကို လှည့်လည်ရောင်းချပေးသော ဈေးကားကိုလည်း ဗဟုသုတဖြစ်စေရန် မျှဝေလိုက်ပါတယ်နော်။

ထို့ကြောင့် ထိုင်းနိုင်ငံ ဘန်ကောက်မြို့သို့ လာရောက်လည်ပတ်သော ဧည့်သည်များအနေဖြင့် အချိန်ကုန် လူပင်ပန်းသက်သာစေရန် မိမိတို့ ဝယ်လိုသော ပစ္စည်းများကို စကားပြန်သို့ ကြိုတင်ပြောခြင်းဖြင့်လည်းကောင်း၊ bliss of us အဖွဲ့သို့ ဆက်သွယ်၍လည်းကောင်း မေးမြန်းနိုင်ပါကြောင်း ကြိုတင်အသိပေးလိုက်ပါရစေနော်။

ထိုင်းနိုင်ငံမှာ ဈေးဝယ်ပြီး မြန်မာနိုင်ငံမှာ ပြန်လည်ရောင်းဖို့အတွက် ဈေးဝယ်လမ်းညွှန်ကိုလည်း ရေးဖို့ ကြိုးစားပါအုံးမည်။

(အဖွဲ့မှ ကြိုးစားပြီး လမ်းညွှန်ပေးခြင်းများ အပေါ်တွင် လိုအပ်ချက်များလည်း ရှိနိုင်ပါသေးတယ်၊ လူအများ အကျိုးရှိဖို့အတွက် လမ်းညွှန်ပေးလိုပါက စာဖတ်သူအနေဖြင့် ကျေးဇူးပြု၍ comment ပေးပြီး ကူညီလမ်းညွှန်ပေးပါရန် တောင်းပန်ပါရစေနော်။)

လေးစားစွာဖြင့်
bliss of us